Home » ຂ່າວ » ຂ່າວພາຍໃນ » .:。✿* ຈັບແລ້ວ!!! ສາຍໂຫດຂັບລົດບັນທຸກ ຕຳຕາຍ 3 ຄົນແລ້ວຫລົບໜີ *✿.。.:

.:。✿* ຈັບແລ້ວ!!! ສາຍໂຫດຂັບລົດບັນທຸກ ຕຳຕາຍ 3 ຄົນແລ້ວຫລົບໜີ *✿.。.:

 ເຈົ້າໜ້າທີ່ຕຳຫຼວດຈະລາຈອນ ປກສ ເມືອງທ່າພະບາດ ແຂວງບໍລິຄຳໄຊໃຫ້ຮູ້ວ່າ: ໃນເວລາປະມານ 22: 20 ໂມງຂອງວັນທີ 10 ທັນວາ 2015 ໄດ້ຮັບແຈ້ງຄວາມຈາກພົນລະເມືອງດີວ່າມີອຸປະຕິເຫດເກີດຂື້ນຢູ່ເສັ້ນທາງເລກທີ 13 ໃຕ້ ເຂດບ້ານພະບາດ ເມືອງທ່າພະບາດ ແຂວງບໍລິຄຳໄຊ

Item fulltext

ຈາກນັ້ນເຈົ້າໜ້າທີ່ ຈຶ່ງໄດ້ຮິບຮ້ອນລົງກວດກາສະຖານທີ່ເກີດເຫດພົບເຫັນລົດຈັກສີດຳ ຍີ່ຫໍ້ ຢາມາຮ່າ ບໍ່ມີປ້າຍ 1 ຄັນ ສະພາບເປ່ເພພໍສົມຄວນ,  ພົບເຫັນຄົນເສຍຊີວິດຄາທີ່ 2 ຄົນຄື: 1 ທ້າວ ຫງວຽນວັນຢຸງ 2 ທ້າວ ເຈີນວັນຖ້າວ ແລະມີຄົນໄດ້ຮັບບາດເຈັບ ສາຫັດ 1 ຄົນຄື: ທ້າວ ດິງຕື໊ຕວັນ (ທັງສາມເປັນຄົນສັນຊາດຫວຽດນາມ), ຈາກນັ້ນເຈົ້າໜ້າທີ່ຈຶ່ງໄດ້ນຳຕົວທ້າວ ດິງຕື໊ຕວັນ ສົ່ງໂຮງໝໍ, ສ່ວນຄູ່ກໍລະນີແມ່ນໄດ້ເອົາຕົວຫຼົບໜີ, ຍ້ອນທົນຕໍ່ຄວາມເຈັບປວດບໍ່ໄດ້ ໃນເວລາຕໍ່ມາ ທ້າວ ດິງຕື໊ຕວັນ ຈຶ່ງໄດ້ເສຍຊີວິດ.

     ນັບແຕ່ມື້ເກີດເຫດມາເຈົ້າໜ້າທີ່ວິຊາສະເພາະໄດ້ປະສານສົມທົບກັບບັນດາກົມກອງ, ກອງຈະລາຈອນແຕ່ລະເມືອງ, ແຕ່ລະແຂວງ ທີ່ປະຈຳຢູ່ປ້ອມຕາມສາຍທາງຕ່າງໆ, ໃຫ້ເອົາໃຈໃສ່ຕິດຕາມລົດເປົ້າໝາຍຜູ້ກະທຳຜິດມາດຳເນີນຄະດີຕາມກົດໝາຍ, ຕົກມາຮອດວັນທີ 10 ກຸມພາ 2016 ທາງເຈົ້າໜ້າທີ່ວິຊາສະເພາະຈຶ່ງພົບເຫັນລົດເປົ້າໝາຍເປັນປະເພດລົດບັນທຸກສີແດງ ໝາຍເລກທະບຽນ ບຂ 0988 ນະຄອນຫຼວງວຽງຈັນ ກຳລັງແລ່ນມຸ່ງໜ້າຂຶ້ນໄປທາງນະຄອນຫຼວງວຽງຈັນ ຈຶ່ງໄດ້ປະສານຫາເຈົ້າໜ້າທີ່ ປກສ ເມືອງທ່າພະບາດ ສະກັດລັດເພື່ອກວດກາລົດຄັນດັ່ງກ່າວຈຶ່ງສາມາດກັກຕົວຜູ້ກະທຳຜິດໄດ້ໃນເວລາປະມານ 11: 00 ໂມງຂອງວັນນັ້ນ.

     ຜ່ານການສືບສວນ-ສອບສວນ: ຈຶ່ງຮູ້ວ່າຜູ້ຂັບຂີ່ລົດບັນທຸກ ຊື່ທ້າວ ພິມ, ອາຍຸ 38 ປີ ບ້ານໜອງບົວນ້ອຍ, ເມືອງຫີນບູນ ແຂວງຄຳມ່ວນ, ຜູ້ກ່ຽວຮັບສາລະພາບວ່າ: ກ່ອນເກີດເຫດໜຶ່ງວັນຜູ້ກ່ຽວໄດ້ຂັບລົດບັນທຸກຄັນດັ່ງກ່າວ (ຮັບຂັບລົດໃຫ້ບໍລິສັດ) ໂດຍບັນທຸກຊີມັງອອກຈາກໂຮງງານຊີມັງ ຕັ້ງຢູ່ເມືອງມະຫາໄຊ ແຂວງຄຳມ່ວນ ມີຈຸດປະສົງໄປສົ່ງ ຢູ່ນະຄອນຫຼວງວຽງຈັນພາຍຫຼັງສົ່ງປູນສຳເລັດແລ້ວມາຮອດເວລາ 18:00 ໂມງ ຂອງເກີດເຫດກໍ່ໄດ້ເດີນທາງມຸ່ງໜ້າກັບເພື່ອໄປແກ່ປູນຊີມັງອີກ, ພໍເດີນທາງມາຮອດເຂດບ້ານພະບາດ ເມືອງພະບາດ ແຂວງບໍລິຄຳໄຊ ເວລາປະມານ 20: 30 ໂມງ ລົດຂອງຜູ້ກ່ຽວກໍ່ໄດ້ເສຍຫຼັກເກີດອຸປະຕິເຫດຕຳລົດຈັກທີ່ຂີ່ສວນທາງມາແຕ່ທາງພາກໃຕ້.

     ພາຍຫຼັງເກີດເຫດຜູ້ກ່ຽວໄດ້ຈຶ່ງໄດ້ເອົາຕົວຫຼົບໜີ, ຂັບລົດມຸ່ງໜ້າລົງໄປທາງໃຕ້ໄປຮອດບ້ານໜອງບົວນ້ອຍ ເມືອງຫີນບູນ ແຂວງຄຳມ່ວນ (ເຮືອນຂອງຜູ້ກ່ຽວ) ຈຶ່ງໄດ້ນອນພັກຜ່ອນ, ມາຮອດເວລາປະມານ 7:00 ໂມງ ຂອງວັນຕໍ່ມາຜູ້ກ່ຽວໄດ້ນຳເອົາລົດໄປສ້ອມແປງຢູ່ທ່າແຂກ ເພື່ອປົກປິດອຳພາງຮ່ອງຮອຍການກະທຳຜິດ ແລະນຳລົດຄັນດັ່ງກ່າວມານຳໃຊ້ປົກກະຕິ.

     ຕົກມາຮອດວັນທີ 10 ກຸມພາ 2016 ຕົນເອງໄດ້ຂັບລົດມຸ່ງໜ້າໄປ ນະຄອນຫຼວງວຽງຈັນ ຈຶ່ງຖືກເຈົ້າໜ້າທີ່ ປກສ ເມືອງທ່າພະບາດກັກຕົວ ສົ່ງໃຫ້ພະແນກຈະລາຈອນ ປກສ ແຂວງບໍລິຄຳໄຊ ດຳເນີນການສືບສວນ-ສອບສວນຕາມກົດໝາຍ.

     ພາຍຫຼັງສືບສວນ-ສອບສວນແລ້ວ ເຈົ້າໜ້າທີ່ພະແນກຈະລາຈອນ ປກສ ແຂວງບໍລິຄຳໄຊ ໄດ້ສະຫຼຸບລາຍງານສຳນວນຄະດີດັ່ງກ່າວໃຫ້ໄອຍະການປະຊາຊົນ ແຂວງບໍລິຄຳໄຊ ສົ່ງຟ້ອງຂຶ້ນສານຕັດສີນຕາມລະບຽບກົດໝາຍ, ມາຮອດວັນທີ 11 ຕຸລາ 2016 ສານປະຊາຊົນແຂວງບໍລິຄຳໄຊ ຈຶ່ງໄດ້ນຳເອົາຄະດີດັ່ງກ່າວອອກມາພິຈາລະນາ: ຕັດສີນໃຫ້ ທ້າວ ພິມ, ອາຍຸ 38 ປີ, ບ້ານໜອງບົວນ້ອຍ ເມືອງຫີນບູນ ແຂວງຄຳມ່ວນ, ຈຳຄຸກ 3 ປີ 6 ເດືອນ  ພ້ອມດ້ວຍໃຊ້ແທນຄ່າເສຍຫາຍທາງແພ່ງຕາມລະບຽບກົດໝາຍ.

ຂໍ້ມູນຂ່າວຈາກ ໜັງສືພິມເສດຖະກິດ-ສັງຄົມ

Facebook Comments

About admin

admin

Check Also

ຂ່າວລາວ – ຕໍາຫລວດຢືນຢັນບໍ່ໄດ້ໃຊ້ກໍາລັງເກີນເຫດໃນການແກ້ໄຂແກ໋ງກວນເມືອງ

 ທ່ານພັນໂທ ຄໍາຜິວ ວັດທະນາພອນ ຫົວໜ້າກອງພັນເຄື່ອນທີ່ ປກສ ນະຄອນຫລວງວຽງຈັນໄດ້ອອກມາຢືນຢັນວ່າ: ໃນໄລຍະຜ່ານມາການປະຕິບັດງານຂອງເຈົ້າໜ້າທີ່ໃນການປາບປາມແກ້ໄຂແກ໋ງກວນເມືອງແມ່ນປະຕິບັດຕາມໜ້າທີ່ ແລະ ບໍ່ໄດ້ໃຊ້ກໍາລັງເກີນກວ່າເຫດຄືດັ່ງຜູ້ປົກຄອງຫລາຍຄົນຄິດ, ພ້ອມຮຽກຮ້ອງເຖິງຜູ້ປົກຄອງຈໍານວນໜຶ່ງຢ່າພຽງແຕ່ຕໍານິຕໍາຫລວດຝ່າຍດຽວ, ຄວນເອົາໃຈໃສ່ສຶກສາອົບຮົມລູກຫລານໃຫ້ເປັນຄົນດີ ແລະ ບໍ່ໃຫ້ໄປເປັນນັກເລງອັນຕະພານສ້າງຄວາມເດືອດຮ້ອນແກ່ສັງຄົມ.              ການຢືນຢັນດັ່ງກ່າວ, ມີຂຶ້ນໃນລະຫວ່າງຊີ້ແຈ້ງຕໍ່ຄໍາສະເໜີຂອງປະຊາຊົນຜ່ານໂທລະສັບສາຍດ່ວນກອງປະຊຸມສະພາປະຊາຊົນນະຄອນຫລວງວຽງຈັນ ເມື່ອບໍ່ດົນມານີ້, ໂດຍໃຫ້ຮູ້ວ່າ: ແກ໋ງຂີ່ລົດກວນເມືອງແມ່ນປາກົດການຫຍໍ້ທໍ້ໜຶ່ງເຮັດໃຫ້ສັງຄົມບໍ່ມີຄວາມສະຫງົບ …

Leave a Reply