Home » ທ່ອງທ່ຽວທົ່ວລາວ » .:。✿* ສຶກສາປະຫວັດສາດຂອງຊາດຜ່ານຖຳ້ວຽງໄຊ *✿.。.:

.:。✿* ສຶກສາປະຫວັດສາດຂອງຊາດຜ່ານຖຳ້ວຽງໄຊ *✿.。.:

ເມືອງວຽງໄຊ, ເຖິງຈະບໍ່ອະທິບາຍແຕ່ຫຼາຍຄົນກໍຄົງຮູ້ດີ ເນື່ອງຈາກເປັນສະຖານທີ່ຕັ້ງທາງຍຸດທະສາດອັນສຳຄັນໃນການຕໍ່ສູ້ກູ້ຊາດຕ້ານ ຈັກກະພັດຕ່າງດ້າວຜູ້ຮຸກຮານ, ຈົນຖືກຂະໜານນາມວ່າ: “ເມືອງວຽງໄຊຖິ່ນກຳເນີດປະເທດລາວ” ເນື່ອງຈາກມີຄວາມກ່ຽວ ພັນທາງປະຫວັດສາດອັນສຳຄັນຂອງຊາດ, ປະຈຸບັນນີ້ ສະຖານທີ່ດັ່ງກ່າວໄດ້ກາຍເປັນແຫລ່ງທ່ອງທ່ຽວທີ່ມີຊື່ສຽງອີກແຫ່ງໜຶ່ງຂອງປະເທດ ກໍຄືເຂດພາກເໜືອຂອງລາວ.   ເມືອງວຽງໄຊໃນເມື່ອກ່ອນ ໂດຍສະເພາະກໍແມ່ນໄລຍະທີ່ລາວຕົກເປັນຫົວເມືອງຂຶ້ນຂອງຈັກກະພັດຕ່າງດ້າວປຽບເໝືອນ ຕົວເມືອງລີ້ລັບອີກແຫ່ງໜຶ່ງຂອງລາວ ຊຶ່ງຈະພົບເຫັນໜ້ອຍຄົນທີ່ສຸດທີ່ຈະອອກມາດຳລົງຊີວິດທ່າມກາງຄວາມໂລ່ງແຈ້ງ ແມ່ນແຕ່ຫຼັງຄາເຮືອນກໍຍັງຍາກທີ່ຈະປາກົດໃຫ້ເຫັນ, ແຕ່ໃນຄວາມເປັນຈິງແລ້ວນັບແຕ່ປີ 1964-1975, ເມືອງວຽງໄຊມີພົນລະເມືອງອາໄສຢູ່ຫຼາຍກວ່າ 20 ພັນຄົນ ຊຶ່ງພວກເຂົາພາກັນຕັ້ງບ້ານເຮືອນຢູ່ຕາມຖ້ຳຕາມຮູ ທັງນີ້ ກໍເພື່ອຄວາມປອດໄພຈາກບັນດາລູກລະເບີດຂອງພວກສັດຕູ, ແຕ່ມີໃຜຮູ້ແດ່ວ່າການຮຽນຮູ້ວິທີເອົາຕົວ ລອດໄປໃນແຕ່ລະວັນນັ້ນ ໄດ້ກາຍເປັນໄຫວພິບແຫ່ງຄວາມສະຫຼຽວສະຫຼາດຂອງປະຊາຊົນຊາວເມືອງວຽງໄຊ ຊຶ່ງຈະຜັນປ່ຽນຊີວິດ ໂດຍສະເພາະກໍແມ່ນເວລາເຮັດວຽກໃນເມື່ອກ່ອນກາງເວັນ ປະຊາຊົນສ່ວນໃຫຍ່ພາກັນພັກຜ່ອນຢູ່ຕາມບ້ານເຮືອນຂອງໃຜລາວ, ສ່ວນກາງຄືນກໍຈະທະຍອຍກັນອອກມາເຮັດໄຮ່ນາ, ປູກຝັງ ແລະ ອື່ນໆເພື່ອຫາລ້ຽງຊີບ ສຳລັບພາຍໃນຖ້ຳກໍສາມາດສ້າງຫຼາຍສິ່ງຢ່າງທີ່ເປັນປະໂຫຍດເປັນຕົ້ນແມ່ນ: ໂຮງຮຽນ, ໂຮງໝໍ, ຕະຫຼາດ, ສູນຂໍ້ມູນຂ່າວສານ ແລະ ອື່ນໆ.
ຢ່າງໃດກໍຕາມ ປະຈຸບັນນີ້ສະຖານທີ່ດັ່ງກ່າວໄດ້ມີການປ່ຽນແປງການດຳລົງຊີວິດຂອງປະຊາຊົນຊາວເມືອງ ວຽງໄຊກໍບໍ່ໄດ້ລຳບາກຄືເມື່ອກ່ອນ ຂະນະດຽວກັນນັ້ນ ເມືອງວຽງໄຊກໍຍັງໄດ້ກາຍເປັນສະຖານທີ່ທີ່ມີຊື່ສຽງອີກແຫ່ງໜຶ່ງຂອງລາວ.
ຊຶ່ງສະຖານທີ່ທ່ອງທ່ຽວທີ່ສຳຄັນຂອງເມືອງວຽງໄຊ ແຂວງຫົວພັນກໍຄົງແມ່ນບັນດາຖ້ຳນ້ອຍ-ໃຫຍ່ແຫ່ງຕ່າງໆລວມເຖິງ 100 ກວ່າແຫ່ງ ແຕ່ທາງພາກສ່ວນກ່ຽວຂ້ອງໄດ້ອະນຸຍາດໃຫ້ນັກທ່ອງທ່ຽວເຂົາໄປທ່ຽວຊົມສະເພາະແຕ່ ສະຖານທີ່ສຳຄັນ ແລະ ອຳນວຍ ຄວາມສະດວກ ໂດຍສະເພາະກໍແມ່ນ: ຖ້ຳທ່ານປະທານສຸພານຸວົງ, ຖ້ຳທ່ານ ໄກສອນພົມວິຫານ, ຖ້ຳທ່ານ ໜູຮັກ ພູມສະຫວັນ, ຖ້ຳທ່ານ ພູມີ ວົງວິຈິດ, ຖ້ຳທ່ານ ຄຳໄຕ ສີພັນດອນ ແລະ ອື່ນໆ  ຊຶ່ງທັງໝົດເຫຼົ່ານັ້ນລ້ວນແຕ່ແມ່ນບັນດາທ່ານຜູ້ນຳທີ່ແສນເຄົາລົບຮັກຂອງ ປວງຊົນລາວທັງຊາດ.
ເອົາເປັນວ່າບັນດານັກທ່ອງທ່ຽວທ່ານໃດຕ້ອງການຢາກສຳຜັດ ສຶກສາປະຫວັດສາດດ້ວຍຕົນເອງກໍສາມາດເດີນທາງໄດ້ເລີຍ ເມື່ອໄປເຖິງເມືອງວຽງໄຊກໍສອບຖາມຂໍ້ມູນ ແລະ ລາຍລະອຽດໄດ້ທີ່ສູນບໍລິການທ່ອງທ່ຽວຖ້ຳ ເມືອງວຽງໄຊ ໂດຍເປີດບໍລິການທຸກວັນ ຊຶ່ງຕອນເຊົ້າເລີ່ມແຕ່ເວລາ 8:00 ໂມງ ເຖິງ 12:00 ໂມງ, ແລະ ຕອນບ່າຍເລີ່ມ ແຕ່ເວລາ 13:30 ໂມງເຖິງ 16:30 ໂມງ, ສຳລັບລາຄາປີ້ເຂົ້າຊົມຄົນລາວ 10.000 ກີບ ຕໍ່ 1 ຄົນ, ນັກຮຽນ ນັກສຶກສາ 5.000 ກີບຕໍ່ 1 ຄົນ, ຕ່າງປະເທດ 30.000 ກີບຕໍ່ 1 ຄົນ, ພິເສດສຳລັບນັກທ່ອງທ່ຽວຈາກບັນດາປະເທດພາກພື້ນແມ່ນ້ຳຂອງ (ຈີນ, ຫວຽດນາມ, ກຳປູເຈຍ, ແລະ ໄທ) ລາຄາປີ້ເຂົ້າຊົມແມ່ນ 20.000 ກີບ ຕໍ່ 1 ຄົນ ສ່ວນກິດຈະກຳທ່ອງທ່ຽວ ເມືອງວຽງໄຊ ທ່ານສາມາດຍ່າງ ຫຼື ຂີ່ລົດຖີບອ້ອມຮອບຕົວເມືອງເພື່ອທ່ຽວຊົມຄວາມງາມຂອງບັນດາຖ້ຳແຫ່ງຕ່າງໆ ໄດ້ຕາມອັດທະຍາໄສທັງມີຮ້ານອາຫານ ແລະ ເຮືອນພັກໄວ້ຄອຍບໍລິການທຸກເວລາ.

ຂໍ້ມູນນຳມາຈາກ ໜັງສືພິມເສດຖະກິດ-ສັງຄົມ

Facebook Comments

About admin

admin

Leave a Reply